WAYANG

Wayang minangka salah sawijining wujud kabudayan kang dipentasake dikanthini iringan swara gamelan lan panembrama utawa lelagon jawa dening para sindhen.pagelaran wayang biasane diwiwiti bengi tumeka esuk, kira-kira tabuh 8 bengi tumeka 4 esuk. Nanging uga ana pagelaran wayang kang amung 2-3 jam pamentasan, kang diarani pakeliran padhat.

Gb 1. Wayang Kulit

Wayang kang misuwur ing kalangan bebrayan agung yaiku wayang kulit utawa wayang purwa, ning saliyane wayang kasebut uga akeh jinising wayang, ing antarane:

1.   Wayang kulit utawa wayang purwa, yaiku wayang kang digawe saka walulang (kulit kewan, biasane kulit kebo), nyritakake lelakon Ramayana lan Mahabarata.

2.  Wayang wong, yaiku wayang sing paragane wong, lelakon kang diceritakake uga Ramayana lan Mahabarata.

Gb 2. Wayang Wong

Gb 3. Wayang Beber

3.  Wayang beber, yaiku mori kang digambari wayang ditontonake sarana dibeber, yen wis rampung banjur digulung maneh. Nyeritakake lelakon Jaka Kembang Kuning karo Dewi Sekartaji.

 

4.  Wayang gedhog, yaiku wayang kang nyeritakake lelakon Panji Asmarabangun (Raden Putra) karo garwane Dewi Candrakirana.

5.  Wayang klithik (krucil), yaiku wayang kang digawe saka kayu gepeng, nyeritakake Prabu Kenya, Damarwulan, Minakjingga, lan sapanunggalane.

Gb 4. Wayang Klithik

6.  Wayang golek (thengul), yaiku wayang kang digawe saka kayu awujud golek, nyeritakake wong Agung Menak (Jayengrana), Umar Maya, lan sapanunggalane.

 

Gb 5. Wayang Golek

7.    Wayang madya, yaiku wayang kulit kang nyeritakake lelakone Parikesit saturunane.

8.    Wayang potehi, yaiku wayang golek kanthi lelakon wong Cina.

9.    Wayang sadat, yaiku wayang kang nyeritakake lakon agama Islam.

10.  Wayang suluh, yaiku wayang kang nyeritakake sejarah Indonesia lan kanggo panyuluhan.

Gb 6. Wayang Suluh

Gb 7. Wayang Suket

    11.  Wayang suket, yaiku wayang kang digawe saka suket, critane bab kahanan saiki lan lumrahe kanggo pitutur utawa kritik marang pamerentah. Wayang suket uga bisa kanggo srana nyeritakake kaya dene lelakon ing wayang kulit.

Kapethik saka Fokus Basa Jawa SMA/MA kelas XII